Ciidamada daacadda u ah madaxweynaha dawlad goboleedka koonfur galbeed
Soomaaliya Col. Maxamed Nuur Shati Guduud, ayaa lagu soo waramayaa in ay
maanta si buuxda ula wareegeen gacan ku haynta gabi ahaanba magaalada
Baydhabo.
Dagaal mar kale dhex maray ciidamada Shaati Guduud iyo labada nin ee ka soo
horjeeda Shiikh aadan Madoobe Iyo Xaabsade, ayaa lagu soo waramayaa in gabi
ahaanba laga sifeeyey magaalada Baydhabo, warar lagu kalsoonaan karo ayaa
sheegaya in la arkayay ciidamada shiikh Aadan Madoobe iyo Xaabsade oo u
cararaya dhinaca Diinsoor.
Dagaalkan maanta dhacay ayaa wuxuu ka danbeeyey ka dib markii la sheegay
inay gabi ahaanba burbureen waan waantii laga dhex waday nimanka imminka
isku hirdinaya gacan ku haynta gobolka Bay iyo waliba Bakool. Danjire
Shariif Saalax iyo Cali Marguus oo ahaa ragga ugu cad cad ee nabadaynta
waday ayaa iyagu ku eedeeyay Shaati Guduud inuu yahay midka iminka mas'uulka
ka ah dagaalkan ka soo cusboonaaday magaalada Baydhabo, Danjire Shariif
Saalax oo isagu soo gaaray magaalada Muqdisho ayaa muujiyey sida uu uga raja
dhigay in xabad joojin laka dhex dhigo qolooyinka ku diriraya deegaankaas.
Magaaladda Baydhabo ayaa xaaladeedu kacsan tahay waxaana la
xiray dhamaanba goobihii ganacsiga ee magaalada Baydhabo iyadoo waliba ay
halkaas horey uga bexeen hay'adihii samafalka oo iyagu dhowaan ka hawl
galayey gobolka Bay Iyo Bakool.
Ma jiraan ilaa iyo hadda warar dheerad ah oo ka soo baxaya dagaalkaas dhacay
maanta oo sharaxaya inta qasaaruhu leegyahay, sidoo kale ma jiraan warar ka
soo baxay labada dhinac ilaa iyo hadda oo ay qeexayaan wixii maanta dhacay.
Guushan uu gaaray Shaati guduud ayaa lagu macneeyey inay
ka danbaysay ka dib markii ay rasaastu ka go'day kuwa ka soo horjeeda, si
walbaba ha ahaatee, lama saadaalin karo halka ay ku danbayn doonto xaaladda
Baydhabo, iyadoo la sheegayo inay baabuur rasaas ah oo ka soo ambabaxday
Itoobiya ay ku soo fool leedahay ciidamda Xaabsade iyo Shiikh Aadan Madobe
oo beryahan danbe ay isku jaal yihii dawladda dalka Itoobiya.
Baydhabo oo loogu yeeri jiray in mudaa Baydhabo Janaay kuna naaloonaysay
nabad iyo barwaaqo ayaa hadda waxay noqotay meel daris u ah rasaasta nool
nool ee ay is dhaafsanyaan raga ku loolamaya maamulka goboladaas oo iyaga
naftirkodu horey ugu midaysnaa ururka RRA.
Qaar ka mida dadka deegaankaas ku dhaqan oo iyagu ka madax bannaan
siyaasadda ayaa sheegaya in khilaafkani uu yahay mid ay ka danbayso dawlada
dalka Itoobiya oo iyadu hadda doonaysa inuu meesha ka baxo Shaati Guduud. si
ay u abuurto rag kale oo u firfircoon.